怕死? 唔怕死?

尋晚同幾個去沙巴旅行既朋友飲野傾行程
上年去布吉, 有波子, 燕, 我和Burn
但今次沒有了Burn, 大家都擔心起來了...
因為我總愛一個人周圍走
佢地就會叫Burn去捉我返唻

很好笑...
有次去蛋島snorkeling
係海度, 我自己一個游開左
佢地叫Burn捉我返去
我返到去話 "頂件救生衣好阻水, 唔用喇!"
然後掉低件野再落水玩
今次連Burn Burn都無著, 跟我一齊去
咁波子同燕見有Burn Burn係度都放心啲

過左陣...佢地見到Burn Burn自己一個返唻
驚訝地問 "喂小琳呢?!"
Burn望住個海是但指 "個邊啩"
"頂我叫你睇住佢加嘛!"
波子同燕即刻攞多件救生衣飛落海搵我
佢地向住Burn指既方向去搵
點知原來我係另一邊...

***

係巿中心行街
我又一個行左去睇野
佢地又叫Burn Burn去捉我返唻
佢地繼續行住先, 但再望返轉頭
Burn同我行左去更遠既地方...

***

係langkawi
我潛完水上返浮台, 即刻再落水浮潛
我又想唔著救生衣, 但佢地唔比
仲叫Burn Burn勸我要著 "喂呀Burn呀過唻勸下小琳啦!"
Burn本身己經落左水, 大叫 "喂小琳快啲落唻啦呢邊有條大魚呀!!"
我答 "好呀即刻唻!!" (心諗, 正呀~ 可以乘機逃走!)

***

其實Burn Burn去可以大家會仲擔心
哈哈~ 次次講返起都笑到肚痛

但我今晚好認真咁同佢地講
我自從住完岩岩個次醫院後
我變得怕死了
唔係因為我真係"怕死"
而係我知道, 如果我有咩事
屋企人會好傷心
呢樣野係人都知, 但今次我係真正明白
點解無啦啦會有咁既體會呢...
係因為訓我隔離床既阿姨影響左我

佢叫Polly
佢好鐘意講野, 就算我唔應佢佢都會講
但我唔應佢佢係唔會唔開心
所以我係可以, 鐘意就應下, 唔鐘意就唔應
同佢相處都好愉快 ~
有一日佢同我傾閒計
話個仔唻探佢, 佢將佢地既對話講比我聽
佢一路講一路笑得好開心
但其實以我做仔女既身份
聽到呢啲內容既反應係 "好普通啫, 有咩咁好笑?"

我諗大家都諗到, 個分別就係
因為佢係一位母親

我呢一世都唔會有機會成為一位母親
一直以為自己可以想像到媽媽既心情
但而家至知, 唔做過呀媽係真係唔會明白

原來仔女只要肯同父母傾計
即使係好普通既對話
父母己經覺得好滿足

我出院回家後
和父母吹水吹左兩粒鐘
媽媽都話好難得
哈哈~

所以, 我唔想死
因為唔想佢地傷心

呀燕聽完就話 "你驚死就最好啦! 你以前真係太唔怕死喇!"
哈哈! 我成日以為自己孑然一身嘛...