今日有位知識份子來探我
最主要係想我敞開個心去傾計
而佢喺我生活入面都算數一數二係我肯咩都講既對象
不過真正坐低2個人傾咁耐都係第一次
我平時唔講唔係因為我唔想講
而係講咗, 人地都唔明既…
我無耐性, 最好對方一聽就明
可惜好多時對方只能做聆聽, 而唔係傾訴對象
呢位知識份子問我有無啲咩係好擔心
其實呢樣野我間唔中都會諗下
但答案係”無乜”
最擔心都係屋企人, 驚佢地唔開心
但其實個天對我地一家好好
比咗咁多年時間去做心理準備
應該好容易接受~
我個人又無咩想做無咩想要
或者咁講, 想做既好多都做咗
話哂 “日日都當係生命最後一日” 既日子都過咗8年咁耐
中間咁多時間比我去實現, 但我反而做得太慢太少
其實可以再做多啲, 不過而家己經無憾了
開心的, 難忘的, 值得回憶的實在有太多太多
佢話研究顯示好多人臨終最後悔係未對某啲人say sorry
然後係I love you
我相信呢2樣既對象都係父母啦
佢話而家老人院會有人去派啲書仔比老人家
類似遺書, 入面有哂問題比佢地去填
例如葬禮想點攪, 有咩說話想講, 一生人最輝煌是什麼等等
填完佢地真係會開心啲
我都想填呀…其實我想寫遺書好多次, 不過…懶得寫
可以填就快好多囉! XD
同佢傾完計, 我發現自己心理質素原來幾好
我上星期睇完本抗癌書
入面講左好多喺生活上應該用咩心態/情緒去面對同處理問題
我除咗做唔到打坐/ 無耐性之外, 其餘所有野我都做到
呢個應該係我生存至今既一大原因!
提下大家, 尤其係返工成日面對複雜人際關係嗰啲
唔係事實既野, 人地講乜都唔好擺喺心度
你自己知道自己唔係就得
如果你因為咁而唔開心, 或者睇低咗自己
即係人地只係攞住把刀嚇下你
但你就攞咗唻插自己一樣, 蠢呀!
