SiuLam.T : 10月 2008

2008年10月28日星期二

沙巴出發!

早晨!!!
我今日出發到沙巴喇!
仲未有旅行既感覺
希望唻梗呢七日勁開心

今次唔拖喼
個包包超重呀...

我會有機會上網
希望update到啦~~~

因為外牆有維修
媽媽貼紙提我地出門前要關窗
文法超奇怪...笑左

2008年10月26日星期日

Agnes B - PR小姐 = 一肚氣!!!

好了...終於回家了...
告訴大家我今晚幹了什麼吧...

今晚 IFC 的 Agnes B 開張攪private function
有好多名人和貴賓入場
而我就是當了五小時的 PR小姐...
相信大家也能從我的文字中感到 "累" 吧...

當知道可以賺外快, 真的感到很震奮 (看我上面的照片就知道...)
還買了一對三吋高跟鞋
因為黑色高跟鞋 + Agnes B staff T 是指定服飾
我被安排到店的另一個因今晚活動而臨時關閉的入口
如果guests行錯了, 我便負責指點他們到正門

原本人工是pay cash
但突然說是pay cheque...
原本工作四小時變成差唔多五小時...
明明係由我地到場 (1900) 既時間開始計起
但又話係由佢地function (1930) 開始計起
我地蝕左半個鐘比佢...
大家都有被騙的感覺...
但無奈往往都選擇唔出聲...

形容一下我的慘況...
1930開始企, 企到2030, 然後有人來讓我休息十分鐘
心想...應該可以定時休息及有水供應吧?
但站到十點半也沒有人理會我們...
而且己經沒有人再入場了...我們還有何作用呢...
但又不讓我們收工...
商場冷氣也關了...身上穿了長袖衫加一件西裝樓及牛仔褲
我感到極熱極渴極餓極腳痛極頭暈...流冷汗和透唔到氣!!
直到撐不下去!!! 決定做少一小時! 賺少啲錢!!
慢慢行返去正門...撞到另一位PR小姐 Yui
佢扶我去, 佢亦都感到極辛苦, 決定一齊走!

見到負責人, 跟她說我不舒服
但只叫我入場找地方坐休息下
可惜場內太多人了, 根本沒有位坐...
我便再行出去說我真的想收工了
她叫我們換衫及寫下a/c no. 入數給我們
因為她們己經在cheque上寫了銀碼!!! 減不了錢!!!
OMG !!!!!!!!! 做乜要寫定?
你地一早都講明, 做埋OT個一小時先有extra
咁即係預左有人唔OT 啦! 咁做乜要寫定呢?
(原定1930到2230, OT係2230至2330)

一直都沒有人給水我喝!
結果走前我和Yui入場各人拿了一支Perrier!!!
佢地完全唔當我地係人囉!!! 好嬲!!!

落電梯時撞正 Agnes B 個老細定唔知 designer 走
成班記者影相, 大家都讓路
但我己經攰到唔想理!
照行係佢地前面! 我對腳痛到無哂知覺! 仲要我等?!
大哂呀?!

我仲見到Angelababy
佢行錯左唻左我個邊入口入場
原本我都幾鐘意佢, 因為佢啲相好靚
全程都係佢經理人開口問路, 佢無出過聲
但佢個樣可以唔洗咁寸同傲慢囉!
望左我一眼之後, 就擺出一種睇唔起人既面孔
再慢慢飄開視線! 好扮野
真人激瘦! 我做完手術最瘦個期都無佢咁瘦!
我唔係針對佢! 但經過今晚見到佢之後
佢淨係比到我好討厭既感覺囉!想嘔!
連同我一齊企個位保安都忍唔住同我講
"唔順超咪唔好入場囉~以為自己邊位呀! 諗住我地會開後門比你入呀?!"

其他唻問路既名人都不知幾有禮貌
Rosemary...莊思敏...楊棦...仲有好多熟口熟面但唔知咩名既model
全部都會笑住講 "唔該請問你...." " 唔該哂~"
我之前訪問過, 什至係TVB入面撞見過既 Artists
十個九個都有禮貌加! 就算唔知我有病
見我望住佢地, 佢地都會微笑囉
明知自己係公眾人物就友善啲啦
入到場就笑騎騎, 假到死

工作前我仲好開心, 帶埋相機諗住同大家影相
但工作後我己經笑唔出, 黑哂面!
可能我太耐無做野, 又無食藥
變左勁易燥底吧!

我返到屋企, 同我一齊做 PR 既 Iris 先岩岩走! (12:xx am)
佢仲慘呀! 企完鋪面, 仲要企出天橋
指啲客人點行去七號碼頭個 after party!
攞 cheque 仲要行到去碼頭先有得攞!
有無攪錯呀?! 對腳咁痛仲要行咁遠!
好無理囉!!!

我而家好憎 Agnes B 同 AB 呀!

2008年10月23日星期四

十月中的近況

幾日無update
係因為日日都無咩特別
雖然大部份時間都出左去
但都係去睇中、西醫
陪貓貓，同朋友hang out...
要大家成日睇我呢啲日誌會感到沒趣吧...
所以沒有寫~

***

星期一帶左貓貓s覆診
蕃薯應該睇到光/影
但芝士其中一隻眼己經唔得...
另一隻都係只睇到光/影...
好怕遲啲要做OT攞個eye ball出唻...
我唔想佢痛呀...

第二日 (Tue) 因為啲eye drops用哂...
咁岩我睇中醫個度又同間診所超近
便去配多支藥水
但中途我雙腳不受控地朝著海旁行...
見到可以坐係海邊...
我就乜都無諗, 個腦空nel nel咁坐左半個鐘...
好好好舒服...唔想走...

(懷疑自己暗啞底唔多開心, 所以想唻睇啲靚野...同埋寧靜下~)

屋企人同朋友都話我瘦左殘左...
中醫把完脈又話我啲怪脈又出返唻
癌細胞又活躍返...個肝又唔好...又話我情緒唔好...
我自己透氣又仲係唔舒服...
今日 (Wed) 去QM見肺科教授又話我最好唔好diving....(遲啲再算)

灰左...

不過我無食荷爾蒙藥差唔多三個星期了
因為食得多, 遲啲會有side effect
我盡量都唔想食...
中醫又話有中藥同埋按腳穴都有用
所以我想試下...
不過又開始有潮熱了...
都唔知捱唔捱到...
(我個樣咁殘可能同無食藥有關...)

講啲開心野
今日去左cwb間商務睇書
見到有個新書既暢銷書榜...

...有我鄧小琳呢!!!!!!!!!!!!!!!!!

我係 17 !!! Yeah ~

發現義工活動似乎係一個月一次...=_=
好想每個星期都去呢...好掛住啲狗狗...

2008年10月18日星期六

狗。義工

小妹今日第一次正式當一個狗義工! (地點錦田)

是次活動是參加以下協會
http://hk.myblog.yahoo.com/concernanimalheart

沒有朋友陪我呢
只有我一個入去, 其他義工我全不認識
還未到達狗場前, 感到很lonely, 好像自閉一像
但當看到狗狗們
牠們便成為了我的傾訴對像, 哈~

這隻叫朱古力
成為第一位被我親手洗白白的客人呢!!!
好彩定唔好彩??
緊係好彩啦!!! 我不知幾咁溫柔呀!!!

不過差唔多全部狗狗都唔鐘意沖涼...
要場主用盡力拖~~~~~~~~~~~~~出唻
場面好攪笑...

下面係牛奶妹
佢同朱古力都好靚
成日行孖咇 ~ 好受歡迎的!

今日主要幫佢地沖涼
好攰呀...全部都係大狗
每隻要用soap洗兩次, 抹乾, 再淋奶水, 洗耳仔, 才叫完成
我好像洗了四五隻左右...腰酸了...

然後餵牠們吃雞柳
好攰, 但勁開心!
因為見到佢地有個好地方可以住
可以幫到佢地
我真係好開心!!!

下面呢隻都好靚好可愛
我好鐘意佢, 不過唔知叫咩名...
(佢好肥加!!! heheheeee)

下面呢隻叫 "大鐘鐘"
係狗場既 PR ! 超乖仔!
個門口都係佢睇住加!
佢會好好守住個狗場, 唔比其他人同狗進入!
好威威哦!!!

上天台時, 啲狗超熱情...
我行到一半樓梯己經撲我...
好彩我敏捷, 扎定個四平八穩馬!
否則一定碌落樓梯!!! (佢地真係幾隻一齊唻, 左手右手咁不停推我...好嬲又好笑)

附送"肥豬大便中"圖片
想瘦既話...就一路食飯一路望住呢張圖啦...
仲要想像個豬pat pat因用力而微震...
啲屎一粒一粒咁掉出唻...

十級肥豬...十倍纖型速度!!!

再附送蕃薯和芝士的近照
是昨天拍的~
牠們己經又跑又跳了~
雖然力度還很輕
但看到牠們一步步的健康
感到極安慰!

蕃薯

上, 下 = 芝士

2008年10月17日星期五

蕃薯與芝士

攞左去朋友屋企後
第二朝就去左睇獸醫
有"農"既眼仔己經痿縮左...
另一隻眼仔就好矇...
但我地觀察左好耐
應該真係睇唔清, 但都見到啲影
因為有時會識避, 有時又唔得...

佢地亦都戒左奶
皮膚無事, 但有缺水同唔識大便既情況...

醫生同姑娘話佢地太可愛
忍唔住請左罐好香噴噴既糧比佢地食~
食得好快!!!

返到屋企
我地好比心機去用濕綿花抹佢地pat pat~
因為貓媽咪會lick佢地pat pat, 話比佢地知係時候要去toilet~
如果佢地唔識去...醫生話會好難養得大...
我地都好緊張...
好彩第一晚蕃薯痾左好大條屎屎!
第二朝就到芝士!

(係喎...無話比大家知, 名己經改了~
大隻啲既係哥哥, 叫蕃薯
細的係妹妹, 叫芝士~)

芝士一叫, 一係要食野, 一係要痾屎, 好準的!
兩隻野己經識得用貓沙喇!! 叻B!!!

但佢地好得意係, 一隻瞓覺時另一隻就會活動
活動個隻會攪醒瞓覺個隻...
用手仔係咁拍對方, 又咬對方...好可愛!
有時又會互摑對方...好好笑~

呢兩日都有去陪佢地
你地要健康呀!

***

我啲朋友今晚約哂去睇 "武俠梁祝"
原本我都有份
但因為多左兩隻貓咪
見者有份~所以我都要出錢助養...變左無錢洗費了
我兩個家姐聽到都話要夾埋一份錢呢~
好多人鍚隻貓咪呀! 好幸福!

但其實重點係...
啲朋友睇完打唻送左三隻字比我 "倖。存。者 !"
所有人...包括勁鐘意吳尊同sa sa既朋友都話...從未睇過一套咁爛既戲!
噢...我聽到都覺得失望呢...

而 "Awake" 就麻麻...
故事很新鮮, 但太短了...
真係太短...............

2008年10月15日星期三

肺科教授...及執到兩隻貓BB

尋日係大埔海濱, 路邊草叢, 發現兩隻極瘦弱的小貓...
佢地好驚...個身震哂...又不停係度叫...
應該係比路邊啲單車嚇親
佢地各自都盲左一隻眼, 有好多濃...
我地係現場搵佢媽咪, 唔見
等左好耐, 都無其他貓出現
照理佢媽咪聽到佢地叫應該會出唻的
所以最後決定帶佢地返屋企...

比奶佢地飲, 但飲左幾啖就無飲
有一隻係紙箱度訓著左...一定係嗌到好攰了...
另一隻就繼續盡力叫
叫到 "釣哂魚" 都仲要叫...好攪笑...但其實又好慘...

我好想養, 但阿媽唔比
唔比咪唔比囉...唔洗咁大反應既...
攪到我好似帶個壞男人返屋企咁...
又話我自己個病都未攪掂, 仲走去醫隻貓
佢意思其實係想話, 我無做野, 洗屋企錢, 仲要屋企養多隻貓...
我明佢地搵錢辛苦
但你咁講野我覺得好hurt囉...
其實講野可以比啲技巧...

點解啲阿媽咁鐘意乜都驚定先? 乜都擔心左先? 咁怕嘗試?
養隻貓唔洗洗好多錢啫...又唔諗下隻貓貓都可以帶到歡樂比我地呀...
又幫到佢地...............

而家佢地係阿兔屋企住, 今日會帶佢地睇醫生
阿兔話佢兩個勁好胃口呢~ (買左貓糧, 浸濕比佢地食) 食飽又訓過

*****

我星期一見完肺科教授
都無上唻同大家講tim...
呢位醫生好老實
講到明, 唻梗如果我要打第三線既化療, 好返機會極微
如果選擇打標杷, 一樣都係好微...像我這種情況的成功例子極少

我的癌細胞生長得很慢, 但很頑強
打梗化療佢都仲可以變大...所以很難對付...
而且啲細胞己經接觸過兩隻藥...令佢地變很更強...
就好似了解左敵人既攻擊方式, 佢地己經識避了...

就算打標杷有效
大多數都只能做到控制佢地唔大
而病人就繼續打...半年...一年...幾年不等
直至隻細胞出現抗藥性...復發...
然後再作打算...
西醫的方法己經變得很被動了

希望其他方法有效吧...
但如果啲癌指數又高返...
我都唔知點算好了....

2008年10月11日星期六

阿鋒生日_BBQ_打牌

20081010

今日去左黃醫師度按腳
呢個星期我訓醒個肺好痛, 唔知做乜
深深吸一啖氣都勁痛, 要企直個人
慢慢吸, 習慣返先好啲, 不過而家愈來愈痛得多...
有同譚醫生講, 但佢覺得無乜野
問我有無撞親我話無
佢話可能係運動多左
不過真係好鬼痛...
醫師叫我聽佢吩咐, 會好快好返
OK 無問題!

另外黃醫師話我身體好左
應該係因為停左藥都一段時間...及有做運動的關係吧~