出院

住了四天醫院, 有不少事可以寫呢, 日誌會長了點, 有耐心看嗎?

 

接回上篇日誌的 “小小燒” 後

己經沒有再燒了
星期五一早便輸兩包血, 每包輸四小時
奇怪雙手的血管這兩天特別幼…
陳醫生 (跟我同齡, 給我有種張敬軒感覺的男醫生) 在我右手手背拮了一下, 但沒有血…平常打化療也是這個位置呀…

最後在我左手手碗, 姆指對落的血管上成功拮了
看到他很緊張…(用了幾分鐘的時間才完成)
我也緊張得連腳板也出汗…

未知是否血管太幼還是輸進來的血太 “傑”
我的手很痛很痛, 最後頂唔順便求神幫手減輕痛楚
結果十秒後真的感到不痛!
跟隔離床的阿姨驚呼 “嘩阿姨! 神好勁呀! 咁快做到野喎!!!”
阿姨也大叫 “咁咪好囉阿焮! 佢咁幫你~ ………….咦? 妳包血原來落哂喇喎~”

………………………….原來係因為落完所以唔痛囉…笑左

到第二包了, 我今次唔求神保佑
睇下今次會唔會痛
結果, 開頭痛左陣, 之後就好多了
唔…原來神都有做到野既~haha!!!

打算keep住個 “豆豆”, 留返第二日落化療
但姑娘幫我落鹽水沖時, 超級痛
所以keep唔到要抆走…
心諗…聽日乖乖地, 一定要拮到血管呀…

****

輸完血大家都話我塊面紅返啲
無之前咁青BB
我即刻飛落床去照鏡, 哈哈
譚醫生問我今晚出唔出院, 我話聽朝都要打化療, 唔返屋企lu
佢聽到後感到很出奇 “咁乖既今次?” (因為我平時一定”縲”出院)
但我要求今晚出街食飯, 哈哈~ 批准了

落左cwb食飯, 跟住打左兩鋪機
大家唔洗驚, 輸完血真係好精神, 無問題!
半夜一點先返病房, 但…我住個邊所有房一個病人都無…
(阿姨剛出院了, 其他病人都回家過節)
啲房無人就會關門, 我間房都關左…
夜媽媽自己推開道門…入面黑文文…仲要沖涼tim…=..=

***

今日中午先落化療藥
因為星期六, 無乜大醫生
搵左個女實習醫生拮我
又簡左我右手手背
開頭拮到有血, 但再推支針入去時, 佢拮穿左條血管…
(佢慢慢一邊了一邊推入去…感覺超恐怖)
係皮下出血…腫左一舊…唔用得
之後佢想拮返我輪血個位
但佢仲瘀梗, 一定好痛同埋唔用得
但佢想夾硬試!
我驚到…哭了……………T^T 係咁求佢唔好
我話不如晏啲先, 佢又話晏啲條血管都唔會變粗
最後, 拮了右手手碗 (很幼)
姑娘在旁為我祈禱, 希望今次順利
結果成功了
雙手受盡折磨下出院…
(聽姑娘講…試過有人拮左十次以上先成功呢! 好慘!!!)

***

打完即刻出院
搭車中途副作用來了
很暈很頭痛
去到旺角食野, 痛到我喊左出唻, 食了止痛藥才好點
但我唔報輸, 所以飯後去左行街!

一路行一路想暈
最後上十大坐, 原本想睇書但訓著了…
醒左之後就去左嘔…
嘔完好返啲, 搭車返屋企中途又暈
回家後訓到昏迷
而家好多了

****

記得我之前啲副成用攪到我又嘔又無胃口嗎?
我跟譚醫生訴苦, 然後他問我 “咁你仲係咪食梗白色個粒丸仔呀?”
“吓咩藥呀?”
“止嘔藥呀~”
“…………………………..” 我諗左陣
“係喎!! 我唔記得有止嘔藥食喎!!! 唓~我仲嘔左成個禮拜tim!!!”
當時係巡房…所以在場還有不少醫生姑娘…大家都笑了…
我覺得自己好白痴囉…

****

有個唔知算唔算係好消息呢
我打埋今日呢針, 就暫時唔洗再打了
因為 2/10 照CT Scan, 我要求不如照埋先打決定打唔打埋佢
結果譚醫生話可以, 因為時間上撞了
所以可以照埋先打, Yeah~