粗口

今天在太陽報看到一則關於現時學生愈來愈爛口的報導
想把有趣部份放上分享一下

該報訪問了 藝人, 律師 及 社工 對粗口的看法 :

藝人-黃秋生
粗口係發洩情緒既語言,全世界都好普遍,低層人士特別鐘意講,因為無第二種語言保護自己。粗口有殺傷力,唔能夠亂用,亦唔好被佢控制。我自己日常係屋企自言自語、開工或者朋友飲野時會講,但唔會係公眾場合大聲講,因為好似食煙咁影響到人。...

律師-黃國桐
粗口係助語詞,用唻加強語氣,當然大家接受到至好講,但只限於單字,唔係一連串粗口。法律界講粗口好普遍,有時唔講直情溝通唔到,係法庭男廁最多粗口聽。粗口係好過癮既語言, 有紓緩緊張氣氛既妙用,例如我地成班行家,係某些觀點上會吹毛求疵或者鑽左牛角尖,為一啲冇乜意義話題拗餐死,但只要講句粗口,緊張氣氛即時輕鬆哂。一句粗口有時勝過一百句說話, 識用其實好好用,所以唔一定唔好或者不雅。不過, 多交通工具既附例限制唔准講粗口,要小心。

社工-邵家殝
粗口就好似鄉下話,係一種獨立語言,用來與人溝通。好多人用階段同年齡去區分講粗口人,認為有錢同靚女講就大罪過巿井流氓,但其實無必要區分。我唔反對講粗口,完全唔講粗口既人好可悲,除左有語言潔癖,亦過份抑壓情緒。學生鐘意講粗口,受父母同朋輩影響並非主要原因, 而係社會認為講粗口唔岩,年輕人故意犯禁,最重要係令佢地 識得咩時候、對住咩人講咩說話。年輕人喜歡用諧音同自創食字粗口,好似叫人粉腸,大家講完得啖笑,展現粗口幽默一面。